虱目魚 蔡連眞

古早毋知啥名字 國姓來臺滋味試

口音問講啥物魚 居民聽做虱目意

雖是流傳的記持 名稱自按來定起

算來嘛有幾百年 買賣交流無異議

平民補品第一支 肉質鮮甜閣開脾

來燉當歸佮生耆 藥性溫和滋血氣

欲食著愛眞細膩 煮湯滴酒濫薑絲

生成比較較厚刺 魚肉咧吮著張持

田地做塭汫水池 外海鹹分無塗味

開溝迵海來養飼 魚料麥片佮青苔

尚驚風颱大水時 水漲流失心傷悲

寒流若來冷吱吱 反肚規窟全橫屍

拄著年冬收成期 捕掠攏是佇半暝

防止跳對隔岸去 牽網予伊無塊覕

漁民辛苦鹹酸甜 若有豐收趁著錢

大細食穿笑微微 感謝天公的保庇

海翁台語文學雜誌月刊第254期(2023年2月1日)

台語世界--252 台語生態詩 虱目魚 蔡連眞